72 ವರ್ಷದ ವೃದ್ಧನನ್ನು ತಿಂದು ಹಾಕಿದ ಸಾಕಿದ 40 ಮೊಸಳೆಗಳು! | Azad Times

ಮೊಸಳೆಗಳು ಇದ್ದ ಜಾಗದಲ್ಲಿ ಬಿದ್ದ 72 ವರ್ಷದ ವೃದ್ದನನ್ನು 40 ಮೊಸಳೆಗಳು ತಿಂದು ಹಾಕಿದ ಭೀಕರ ಘಟನೆ ಕಾಂಬೊಡಿಯಾದಲ್ಲಿ ನಡೆದಿದೆ.

72 ವರ್ಷ ವೃದ್ಧ ಲುವಾನ್ ನಾಮ್ ಮೃತಪಟ್ಟಿದ್ದು, ವೃದ್ಧನ ಕುಟುಂಬ ಮೊಸಳೆಗಳನ್ನು ಸಾಕಾಣಿಕೆ ಮಾಡುತ್ತಿದ್ದು, ಗುರುವಾರ ಮೊಸಳೆಗಳು ಇದ್ದ ಜಾಗದಲ್ಲಿ ವೃದ್ಧ ಆಯತಪ್ಪಿ ಬಿದ್ದಿದ್ದರಿಂದ ಈ ದುರ್ಘಟನೆ ಸಂಭವಿಸಿದೆ.

ಮೊಟ್ಟೆ ಇರಿಸಿದ್ದ ಮೊಸಳೆಯನ್ನು ಹೊರಗೆ ಕಳುಹಿಸಲು ವೃದ್ಧ ಲುವಾನ್ ನಾಮ್ ಕೋಲಿನಿಂದ ತಳ್ಳಿ ಪ್ರಯತ್ನಿಸುತ್ತಿದ್ದಾಗ ಕೋಲನ್ನು ಗಟ್ಟಿಯಾಗಿ ಕಚ್ಚಿ ಹಿಡಿದು ಮೊಸಳೆ ಬಲವಾಗಿ ಎಳೆದಿದೆ.  ಇದರಿಂದ ಆಯತಪ್ಪಿದ ವೃದ್ಧ ಕೋಲಿನ ಸಮೇತ ಮೊಸಳೆಗಳ ವಾಸಸ್ಥಳದೊಳಗೆ ಬಿದ್ದಿದ್ದಾರೆ.

ಕ್ಷಣಮಾತ್ರದಲ್ಲಿ ಅಲ್ಲಿದ್ದ ಮೊಸಳೆಗಳ ಹಿಂಡು ಅವರ ಮೇಲೆ ದಾಳಿ ನಡೆಸಿದ್ದು, ವೃದ್ಧನ ದೇಹವನ್ನು ಛಿದ್ರಗೊಳಿಸಿ ತಿಂದು ಹಾಕಿವೆ.

ಮೊಟ್ಟೆ ಇರಿಸಿದ್ದ ಪಂಜರದಿಂದ ಮೊಸಳೆಯನ್ನು ಹೊರಗೆ ಓಡಿಸುತ್ತಿದ್ದಾಗ, ಮೊಸಳೆಯು ಕೋಲಿನ ಮೇಲೆ ದಾಳಿ ನಡೆಸಿದೆ. ಇದರಿಂದ ಆಯ ತಪ್ಪಿದ ಅವರು ಆವರಣದ ಒಳಗೆ ಬಿದ್ದಿದ್ದಾರೆ. ಬಳಿಕ ಇತರೆ ಮೊಸಳೆಗಳು ಅವರು ಬಿದ್ದ ಜಾಗದತ್ತ ನುಗ್ಗಿದ್ದವು. ಪರಿಣಾಮ ಅವರಿಗೆ ಅಲ್ಲಿಂದ ಪಾರಾಗಲು ಸಾಧ್ಯವಾಗದಂತೆ ದಾಳಿ ನಡೆಸಿದವು. ವೃದ್ಧನ ಕೈಗಳನ್ನು ಕಚ್ಚಿ ಎಳೆದ ಮೊಸಳೆಗಳು ಒಂದು ಕೈಯನ್ನು ನುಂಗಿವೆ ಎಂದು ಸೀಯೆಮ್ ರೀಪ್ ಸಮೂಹದ ಪೊಲೀಸ್ ಮುಖ್ಯಸ್ಥ ಮೀ ಸಾವ್ರಿ ವಿವರಿಸಿದ್ದಾರೆ.

ಸ್ಥಳೀಯ ಮೊಸಳೆ ಕೃಷಿಕರ ಸಂಘಟನೆಯ ಅಧ್ಯಕ್ಷರಾಗಿದ್ದ ಲುವಾನ್ ಆಮ್ ಅವರ ಬಳಿ ಮೊಸಳೆ ಸಾಕಾಣಿಕೆ ಕೆಲಸವನ್ನು ಬಿಟ್ಟುಬಿಡುವಂತೆ ಕುಟುಂಬ ಅನೇಕ ವರ್ಷಗಳಿಂದ ಒತ್ತಾಯಿಸುತ್ತಾ ಬಂದಿತ್ತು. ಆದರೆ ಲುವಾನ್ ಅದನ್ನು ಒಪ್ಪಿರಲಿಲ್ಲ. ಈಗ ಲುವಾನ್ ಅವರೇ ಮೊಸಳೆಗಳಿಗೆ ಬಲಿಯಾದ ಕಾರಣ ತಮ್ಮಲ್ಲಿನ ಎಲ್ಲ ಮೊಸಳೆಗಳನ್ನು ಮಾರಾಟ ಮಾಡಲು ಕುಟುಂಬ ಮುಂದಾಗಿದೆ.