4ನೇ ಟೆಸ್ಟ್: ಅಶ್ವಿನ್ ಗೆ 6 ವಿಕೆಟ್, ಆಸ್ಟ್ರೇಲಿಯಾ 480ಕ್ಕೆ ಆಲೌಟ್ | Azad Times

ಉಸ್ಮಾನ್ ಖ್ವಾಜಾ ಮತ್ತು ಕೆಮರೂನ್ ಗ್ರೀನ್ ಶತಕಗಳ ನೆರವಿನಿಂದ ಆಸ್ಟ್ರೇಲಿಯಾ ತಂಡ 4ನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದ ಮೊದಲ ಇನಿಂಗ್ಸ್ ನಲ್ಲಿ 480 ರನ್ ಗೆ ಆಲೌಟಾಗಿದ್ದರೆ, ಭಾರತ ವಿಕೆಟ್ ಕಳೆದುಕೊಳ್ಳದೇ ಶುಭಾರಂಭ ಮಾಡಿದೆ.

ಅಹಮದಾಬಾದ್ ನಲ್ಲಿ ನಡೆಯುತ್ತಿರುವ ಪಂದ್ಯದ ಎರಡನೇ ದಿನವಾದ ಶುಕ್ರವಾರ 4 ವಿಕೆಟ್ ಗೆ 244 ರನ್ ಗಳಿಂದ ದಿನದಾಟ ಮುಂದುವರಿಸಿದ ಆಸ್ಟ್ರೇಲಿಯಾ 480 ರನ್ ಗೆ ಪತನಗೊಂಡಿತು. ದಿನದಾಂತ್ಯಕ್ಕೆ ಭಾರತ ವಿಕೆಟ್ ನಷ್ಟವಿಲ್ಲದೇ 36 ರನ್ ಗಳಿಸಿದೆ.

ಆಸ್ಟ್ರೇಲಿಯಾ ಪರ ಉಸ್ಮಾನ್ ಖ್ವಾಜಾ 422 ಎಸೆತಗಳಲ್ಲಿ 21 ಬೌಂಡರಿ ಸೇರಿದ 180 ರನ್ ಗಳಿಸಿ ಔಟಾದರೆ, ಕೆಮರೂನ್ ಗ್ರೀನ್ 170 ಎಸೆತಗಳಲ್ಲಿ 18 ಬೌಂಡರಿ ಒಒಳಗೊಂಡ 114 ರನ್ ಬಾರಿಸಿದರು.

ಭಾರತದ ಪರ ರವಿಚಂದ್ರನ್ ಅಶ್ವಿನ್ 6 ವಿಕೆಟ್ ಪಡೆದು ಆಸ್ಟ್ರೇಲಿಯಾಕ್ಕೆ ಲಗಾಮು ಹಾಕಿದರು. ಮೊಹಮದ್ ಶಮಿ 2, ರವೀಂದ್ರ ಜಡೇಜಾ, ಅಕ್ಸರ್ ಪಟೇಲ್ ತಲಾ 1 ವಿಕೆಟ್ ಗಳಿಸಿದರು.