ರಹಾನೆ, ದುಬೆ ಅಬ್ಬರಕ್ಕೆ ಬೆಚ್ಚಿದ ಕೆಕೆಆರ್: ಅಗ್ರಸ್ಥಾನಕ್ಕೆ ಜಿಗಿದ ಚೆನ್ನೈ ಸೂಪರ್ ಕಿಂಗ್ಸ್! | Azad Times

ಮಧ್ಯಮ ಕ್ರಮಾಂಕದಲ್ಲಿ ಅಜಿಂಕ್ಯ ರಹಾನೆ ಮತ್ತು ಶಿವಂ ದುಬೆ ಅವರ ಸಿಡಿಲಬ್ಬರದ ಅರ್ಧಶತಕಗಳ ನೆರವಿನಿಂದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ 49 ರನ್ ಗಳಿಂದ ಕೋಲ್ಕತಾ ನೈಟ್ ರೈಡರ್ಸ್ ತಂಡವನ್ನು ಸೋಲಿಸಿ ಐಪಿಎಲ್ ಟಿ-20 ಟೂರ್ನಿಯಲ್ಲಿ ಅಗ್ರಸ್ಥಾನಕ್ಕೆ ಜಿಗಿದಿದೆ.

ಈಡನ್ ಗಾರ್ಡನ್ ಮೈದಾನದಲ್ಲಿ ಭಾನುವಾರ ನಡೆದ ಎರಡನೇ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ 20 ಓವರ್ ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 235 ರನ್ ಪೇರಿಸಿತು. ಬೆಟ್ಟದಂಥ ಗುರಿ ಬೆಂಬತ್ತಿದ ಕೆಕೆಆರ್ ತಂಡ 20 ಓವರ್ ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 186 ರನ್ ಗಳಿಸಲಷ್ಟೇ ಶಕ್ತವಾಯಿತು. ಈ ಗೆಲುವಿನೊಂದಿಗೆ ಚೆನ್ನೈ 7 ಪಂದ್ಯಗಳಲ್ಲಿ 5 ರಲ್ಲಿ ಜಯ ಸಾಧಿಸಿ 10 ಅಂಕದೊಂದಿಗೆ ಅಗ್ರಸ್ಥಾನಕ್ಕೇರಿತು.

ಕೆಕೆಆರ್ ತಂಡ 1 ರನ್ ಗೆ 2 ವಿಕೆಟ್ ಕಳೆದುಕೊಂಡು ಆಘಾತಕ್ಕೆ ಒಳಗಾಯಿತು. ವೆಂಕಟೇಶ್ ಅಯ್ಯರ್ (20) ಮತ್ತು ನಿತಿಶ್ ರಾಣಾ (27) ಕೂಡ ಸಾಧಾರಣ ಮೊತ್ತಕ್ಕೆ ನಿರ್ಗಮಿಸಿದರು. ಆದರೆ ಮಧ್ಯಮ ಕ್ರಮಾಂಕದಲ್ಲಿ ಜೇಸನ್ ರಾಯ್ ಮತ್ತು ರಿಂಕು ಸಿಂಗ್ ಅರ್ಧಶತಕ ಬಾರಿಸಿ ಹೋರಾಟ ನಡೆಸಿದರೂ ಬೃಹತ್ ಮೊತ್ತ ಬೆಂಬತ್ತಲು ವಿಫಲರಾದರು.

ಜೇಸನ್ ರಾಯ್ 26 ಎಸೆತಗಳಲ್ಲಿ 5 ಬೌಂಡರಿ ಮತ್ತು 5 ಸಿಕ್ಸರ್ ಸೇರಿದ 61 ರನ್ ಸಿಡಿಸಿದರು. ರಿಂಕು ಸಿಂಗ್ 33 ಎಸೆತಗಳಲ್ಲಿ 3 ಬೌಂಡರಿ ಮತ್ತು 4 ಸಿಕ್ಸರ್ ಸೇರಿದ ಅಜೇಯ 53 ರನ್ ಬಾರಿಸಿದರು. ಆದರೆ ಸತತ 5 ಸಿಕ್ಸರ್ ಬಾರಿಸಿ ರೋಚಕ ಗೆಲುವು ತಂದುಕೊಟ್ಟಿದ್ದ ರಿಂಕು ಈ ಪಂದ್ಯದಲ್ಲಿ ಕೊನೆಯ 9 ಎಸೆತದಲ್ಲಿ 1 ಸಿಕ್ಸರ್ ಮಾತ್ರ ಬಾರಿಸಲಷ್ಟೇ ಸಮರ್ಥರಾದರು.

ಇದಕ್ಕೂ ಮುನ್ನ ಬ್ಯಾಟ್ ಮಾಡಿದ ಚೆನ್ನೈ ತಂಡಕ್ಕೆ ರಹಾನೆ, ಶಿವಂ ದುಬೆ ಮತ್ತು ಡೆವೊನ್ ಕಾನ್ವೆ ಅರ್ಧಶತಕ ಬಾರಿಸಿ ತಂಡ ಬೃಹತ್ ಮೊತ್ತ ಪೇರಿಸಲು ನೆರವಾದರು. ಡೆವೊನ್ ಕಾನ್ವೆ 40 ಎಸೆತಗಳಲ್ಲಿ 4 ಬೌಂಡರಿ ಮತ್ತು 3 ಸಿಕ್ಸರ್ ಸೇರಿದ 56 ರನ್ ಬಾರಿಸಿ ಟೂರ್ನಿಯಲ್ಲಿ ಸತತ 4 ಶತಕ ಬಾರಿಸಿದ ಗೌರವಕ್ಕೆ ಪಾತ್ರರಾದರು.

ರಹಾನೆ ಒಂದೇ ಓವರ್ ನಲ್ಲಿ 4 ಸಿಕ್ಸರ್ ಮತ್ತು 1 ಬೌಂಡರಿ ಸೇರಿದಂತೆ 29 ಎಸೆತದಲ್ಲಿ 6 ಬೌಂಡರಿ ಮತ್ತು 5 ಸಿಕ್ಸರ್ ಒಳಗೊಂಡ 71 ರನ್ ಸಿಡಿಸಿ ಉಗ್ರ ಆಟ ಪ್ರದರ್ಶಿಸಿದರು. ಶಿವಂ ದುಬೆ 21 ಎಸೆತಗಳಲ್ಲಿ 2 ಬೌಂಡರಿ ಮತ್ತು 5 ಸಿಕ್ಸರ್ ಸಹಾಯದಿಂದ 50 ರನ್ ಪೂರೈಸಿದರು. ಜಡೇಜಾ 2 ಸಿಕ್ಸರ್ ಸೇರಿದ ಅಜೇಯ 18 ರನ್ ಗಳಿಸಿದರು.