ವಿದ್ಯುತ್ ಕಡಿತದಿಂದ ಬೇಸತ್ತು ಡಿಸಿಎಂ ಫಡ್ನವೀಸ್ ಮನೆಗೆ ಹುಸಿಬಾಂಬ್ ಕರೆ ಮಾಡಿದ! | Azad Times

ಪದೇಪದೆ ವಿದ್ಯುತ್ ಕಡಿತದಿಂದ ಬೇಸತ್ತ ವ್ಯಕ್ತಿಯೊಬ್ಬ ಮಹಾರಾಷ್ಟ್ರ ಉಪ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಅವರ ಮನೆಗೆ ಹುಸಿ ಬಾಂಬ್ ಕರೆ ಮಾಡಿ ಬೆದರಿಸಿದ ಘಟನೆ ಮಂಗಳವಾರ ನಡೆದಿದೆ.

ನಾಗ್ಪುರದಲ್ಲಿರುವ ದೇವೇಂದ್ರ ಫಡ್ನವೀಸ್ ಮನೆಗೆ 30 ವರ್ಷದ ಹುಸಿ ಬಾಂಬ್ ಕರೆ ಮಾಡಿದ್ದು, ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ಮನೆಯಲ್ಲಿ ಪದೇಪದೆ ವಿದ್ಯುತ್ ಕಡಿತ ಆಗುತ್ತಿದ್ದರಿಂದ ಬೇಸತ್ತ ನಾಗ್ಪುರದಿಂದ 30 ಕಿ.ಮೀ. ದೂರದ ಕನ್ಹಾನ್ ನಿವಾಸಿ ಫಡ್ನವೀಸ್ ಮನೆಗೆ ಮಂಗಳವಾರ ಮಧ್ಯಾಹ್ನ 2 ಗಂಟೆ ಸುಮಾರಿಗೆ ಕರೆ ಮಾಡಿ ಮನೆಯ ಹೊರಗೆ ಬಾಂಬ್ ಇರಿಸಲಾಗಿದೆ ಎಂದು ಹೇಳಿ ಕರೆ ಕಟ್ ಮಾಡಿದ್ದ.

ಬಾಂಬ್ ಬೆದರಿಕೆ ಬರುತ್ತಿದ್ದಂತೆ ಪೊಲೀಸರು ಹಾಗೂ ಶ್ವಾನದಳ ಫಡ್ನವೀಸ್ ಮನೆಗೆ ಆಗಮಿಸಿ ಪರಿಶೀಲನೆ ನಡೆಸಿದ್ದು, ಬಾಂಬ್ ಪತ್ತೆಯಾಗಲಿಲ್ಲ. ಇದೊಂದು ಹುಸಿ ಬೆದರಿಕೆ ಎಂದು ಪೊಲೀಸರು ದೃಢಪಡಿಸಿಕೊಂಡರು. ಘಟನೆ ವೇಳೆ ಫಡ್ನವೀಸ್ ಕುಟುಂಬ ಮುಂಬೈಗೆ ತೆರಳಿತ್ತು.