ಯುವಕನ ಹೊಟ್ಟೆಯಲ್ಲಿತ್ತು 56 ಬ್ಲೇಡ್ ಗಳು! | Azad Times

ಹೊಟ್ಟೆನೋವು ಮತ್ತು ರಕ್ತದ ವಾಂತಿ ಆಗುತ್ತಿದೆ ಎಂದು ಬಂದ 26 ವರ್ಷದ ಯುವಕನ ಹೊಟ್ಟೆಯಲ್ಲಿದ್ದ 56 ರೇಜರ್ ಬ್ಲೇಡ್ ಗಳನ್ನು ವೈದ್ಯರು ಹೊರತೆಗೆದ ಆಘಾತಕಾರಿ ಘಟನೆ ರಾಜಸ್ಥಾನದಲ್ಲಿ ನಡೆದಿದೆ.

ರಾಜಸ್ಥಾನದ ಜಲ್ಲೋರಿ ಜಿಲ್ಲೆಯಲ್ಲಿ ಈ ಘಟನೆ ನಡೆದಿದ್ದು, ಅತಿಯಾದ ಹೊಟ್ಟೆ ನೋವು ಹಾಗೂ ರಕ್ತದ ವಾಂತಿ ಆಗಿದ್ದರಿಂದ ಸ್ನೇಹಿತರು ಕೂಡಲೇ ಆಸ್ಪತ್ರೆಗೆ ದಾಖಲಿಸಿದಾಗ ಈ ವಿಷಯ ಬೆಳಕಿಗೆ ಬಂದಿದೆ.

ಯಶ್ ಪಾಲ್ ಸಿಂಗ್ ಎಂಬ 26 ವರ್ಷದ ಯುವಕನನ್ನು ಕೂಡಲೇ ಆಸ್ಪತ್ರೆಗೆ ದಾಖಲಿಸಿಕೊಂಡ ಬೆನ್ನಲ್ಲೇ ಸೊನೊಲೋಜಿ ತಪಾಸಣೆ ಮಾಡಿಸಿದಾಗ ಹೊಟ್ಟೆಯಲ್ಲಿ ಬ್ಲೇಡ್ ಗಳು ಇರುವುದು ಪತ್ತೆಯಾಯಿತು. ಕೂಡಲೇ ವೈದ್ಯರು ಶಸ್ತ್ರಚಿಕಿತ್ಸೆ ಮಾಡಿ ರೇಜರ್ ಬ್ಲೇಡ್ ಗಳನ್ನು ಹೊರತೆಗೆದಿದ್ದಾರೆ.

ಡಾ.ನಾರ್ಸಿ ರಾಮ್ ದೇಸಾಯಿ ನೇತೃತ್ವದ 7 ವೈದ್ಯರ ತಂಡ ಸುಮಾರು 3 ಗಂಟೆಗಳ ಕಾಲ ಶಸ್ತ್ರಚಿಕಿತ್ಸೆ ಮಾಡಿ ಯಶ್ ಪಾಲ್ ಅವರನ್ನು ರಕ್ಷಿಸಿದೆ.

ಯಶ್ ಪಾಲ್ ಅವರನ್ನು ಪರಿಶೀಲಿಸಿದಾಗ ಕುತ್ತಿಗೆ ಭಾಗದಿಂದ ಹಿಡಿದು ದೇಹದ ಹಲವಾರು ಕಡೆ ಕೊಯ್ದು ರಕ್ತಸ್ರಾವ ಉಂಟಾಗಿದ್ದನ್ನು ಪತ್ತೆ ಹಚ್ಚಿದ್ದಾರೆ.

ಬ್ಲೇಡ್ ಪ್ಯಾಕೆಟ್ ಅನ್ನು ಬಾಯಿಗೆ ಹಾಕಿಕೊಂಡು ಪುಡಿಪುಡಿ ಮಾಡಿ ಉಗಿಯುವ ಅಭ್ಯಾಸವನ್ನು ಯಶ್ ಪಾಲ್ ಹೊಂದಿದ್ದ. ಆದರೆ ಪ್ಯಾಕೆಟ್ ನಲ್ಲಿದ್ದ ಬ್ಲೇಡ್ ಗಳು ಹೊಟ್ಟೆಯೊಳಗೆ ಸೇರಿಕೊಂಡಿದ್ದು, ಇದನ್ನು ಆತ ಗಂಭೀರವಾಗಿ ಪರಿಗಣಿಸದೇ ಇದ್ದ ಕಾರಣ ಈ ಸಮಸ್ಯೆ ಗಂಭೀರವಾಗಿದೆ ಎಂದು ವೈದ್ಯರು ಘಟನೆಯನ್ನು ವಿವರಿಸಿದ್ದಾರೆ